Microsoft howany çaklamak üçin niýetlenen täze Aurora EA modelini hödürledi. Modeliň iş netijeleri bilen gözleg Nature žurnalynda neşir edildi.
Fiziki deňlemelere esaslanýan adaty usullardan tapawutlylykda Aurora diňe arhiw maglumatlary bilen okadyldy. Bu hem ýokary takyklygy saklamak bilen, hasaplaýyş çykdajylaryny onlarça, hatda ýüzlerçe esse azaltmaga mümkinçilik berdi. Köp ýagdaýda Aurora halkara meteo-merkezlerinden has gowy netijeleri görkezdi. Ýewropanyň orta möhletli çaklamalar merkezi (ECMWF) bilen deňeşdirmeleriň 92%-inde Aurora 10 gün öňünden has takyk global çaklamalary berdi.
Mysal üçin, model 2023-nji ýylyň ähli harasatlaryny, şol sanda Filippinlere inen Doksuri taýfunyny takyk çaklady. Resmi çaklamalar tupanyň Taýwandan demirgazyga süýşjekdigini aýdýarka, Aurora onuň ugruny we zarba wagtyny öňünden kesgitledi. Pensilwaniýadan inženerlik professory Paris Perdikarisiň aýtmagyna görä, ilkinji gezek EA häzirki meteorologiýa merkezlerinden has takyk boldy.
Bilermenler ýakyn ýyllarda hakyky wagtda hemra we ýerüsti maglumatlary ulanyp biljek EA ulgamlaryny ösdürmegiň möhüm boljakdygyny çaklaýar. Microsoft Aurora-nyň täjirçilik taýdan ornaşdyrylmagynyň howa gözegçiligine bolan çemeleşmäni üýtgedip biljekdigini belleýär.
