Öňki The Beatles toparynyň agzasy Pol Makkartni sözsüz we sazsyz, dowamlylygy 2 minut 45 sekunt bolan trek ýazga geçirdi (ýa-da döretdi). Şeýlelik bilen, sazanda ýewropaly kärdeşlerine goşulyp, aýdym-saz pudagynda emeli aňyň (EA) ulanylmagyna garşylyk bildirdi diýip, The Guardian ýazýar.
Düşündirişine görä, diňleýjiler ilki plýonkanyň 55 sekuntlyk şygyrdy sesini, soňra gapynyň kakylmasyny ýa-da otagdaky aýak seslerini ýatladýan 15 sekuntlyk sesleri, ondan soňra bolsa ahyrynda peselip ýitýän, ýene 80 sekuntlyk şygyrdy we hyşşyldy eşiderler.
Bu trek Is This What We Want? (“Şu biziň isleýänimiz?”) atly toparlaýyn «sessiz» alboma goşular. Albomyň sanly görnüşi 2025-nji ýylyň fewral aýynda çykaryldy we Makkartniniň bonus-trekli gramplastinkasy bolsa 2025-nji ýylyň noýabr aýynda çykmagy meýilleşdirilýär.
Gazetiň belleýşi ýaly, albomdaky ähli kompozisiýalar boş aýdym-saz studiýalarynda ýazga alnypdyr; olarda adaty aýdym-sazlaryň we sözleriň deregine, ýuwaş hyşşyldylar we tyrkyldylar eşidilýär. Oňa gatnaşyjylaryň arasynda Keýt Buş, The Clash, Pet Shop Boys, kinokompozitor Hans Simmer, Blur we Gorillaz toparlarynyň frontmeni Deýmon Albarn we beýleki meşhur ýerine ýetirijiler bar.
«Britaniýanyň hökümeti emeli aň kompaniýalarynyň bähbidi üçin aýdym-saz ogurlygyny kanunlaşdyrmaly däl» - diýlip, täze albomyň ýanyndaky bildirişde (ýa-da duýduryşda) aýdylýar.
