OpenAI kompaniýasy Instacart amerikan eltip berme hyzmatynyň häzirki baş direktory we Facebook App-yň öňki ýolbaşçysy Fiji Simonyň programma üpjünçiliginiň ösüş ugruna ýolbaşçy hökmünde bellenendigini habar berdi. OpenAI-yň ýolbaşçysy Sem Altman X sosial torundaky sahypasynda bu çäräniň oňa barlaglara, hasaplaýyş mümkinçiliklerine we emeli aňyň howpsuzlygyna üns bermäge mümkinçilik berjekdigini aýtdy.
«The Verge» neşiriniň maglumatlaryna görä, Simo 2011-nji ýylda Facebook kompaniýasyna goşuldy, 2019-njy ýylda bolsa sosial toruň ykjam goşundysynyň ösüşine ýolbaşçylyk etdi. Onuň ýolbaşçylygynda habarlar lentasy, Stories (Hekaýalar) we göni ýaýlym ýaly esasy aýratynlyklar döredildi, bu hem kompaniýanyň mahabatdan girdeji gazanmagyna uly täsir etdi. 2021-nji ýylda ol Instacart kompaniýasyna baş direktor hökmünde geçdi we iki ýylyň içinde kompaniýany IPO çykmaga (paýnamalaryny ilkinji gezek satmaga) taýýarlady.
Simo geçen ýyldan bäri OpenAI-yň direktorlar geňeşiniň agzasy bolsa-da, ol häzirlikçe Instacart-daky wezipesini taşlamaz. Ol LinkedIn sahypasyndaky beýanatynda işgärlere «ýene birnäçe aý wezipesinde galjakdygyny» we täze ýolbaşçy bellenýänçä işini dowam etdirjekdigini aýtdy.
Mobil programmalaryň kämilleşdirilmegi OpenAI üçin örän möhümdir, sebäbi ChatGPT häzirki wagtda ähli esasy platformalardaky, ýagny iOS, Android, Windows we macOS-daky ulanyjylar üçin elýeterli. Şeýle hem ýatlatsak, kompaniýa Twitter-e meňzeş öz sosial toruny döretmegiň üstünde işleýär.
