Alibaba kompaniýasy özüniň «Taobao» we «Tmall» elektron söwda platformalaryny täzelemäge taýýarlanýar. Kompaniýa haryt saýlamak we satyn almak işini gürrüňdeşlik arkaly amala aşyrmak üçin Qwen atly emeli aň ulgamyny ornaşdyrdy.
Indi ulanyjylar adaty açar sözler arkaly gözleg etmegiň deregine, emeli aň bilen gönümel gürleşip bilerler. «Qwen» goşundysy arkaly alyjylara «Taobao» we «Tmall» platformalaryndaky 4 milliarddan gowrak haryt elýeterli bolar.
Emeli aň harytlary saýlap berer we olary biri-biri bilen deňeşdirer. Sargytlary resmileşdirmäge, eltip berme hyzmatyna gözegçilik etmäge we satyn alandan soňky hyzmatlara kömek eder.
Ulgam ulanyjynyň öňki satyn alan zatlaryna we gyzyklanmalaryna esaslanyp, oňa degişli maslahatlary berer.
Şol bir wagtyň özünde «Taobao» goşundysynyň içinde «Qwen» esasynda işleýän wirtual kömekçi peýda bolar. Onuň täze funksiýalarynyň arasynda harytlary wirtual geýip görmek we bahalaryň 30 günüň dowamyndaky üýtgeýşine gözegçilik etmek mümkinçilikleri bar.
Reuters agentliginiň maglumatyna görä, Alibaba onlaýn söwdany adaty gözlegden sanly geňeşçi bilen şahsy aragatnaşyga öwürmegi maksat edinýär.
