ChatGPT-niň işläp düzüjisi OpenAI kompaniýasy Twitter-e meňzeş öz sosial toruny döretmegiň üstünde işleýär. Bu barada çeşmelerine salgylanyp, «The Verge» neşiri habar berýär.
Taslama häzirlikçe irki tapgyrda, emma eýýämden kompaniýanyň içinde ulanylýan prototipi bar diýlip bellenilýär. OpenAI-yň baş direktory Sem Altman bu taslama boýunça käbir adamlar bilen pikir alşypdyr.
Häzirlikçe bu sosial toruň aýratyn bir programma hökmünde ýa-da ChatGPT-niň içine integrirlenen görnüşde çykaryljakdygy belli däl.
«The Verge» neşiriniň ýazmagyna görä, OpenAI-yň öz sosial toruny döretmegi oňa ChatGPT-ni türgenleşdirmek üçin zerur maglumatlary häzirki wagtda ýygnamaga mümkinçilik berer. Muny Meta eýýämden edýär, ol LLaMA modelini Facebook-daky mazmunlar bilen türgenleşdirýär. Şeýle-de belläp geçsek, Ilon Mask hem Grok emeli aň modelini X sosial torunyň düzüminde işe girizipdi.
