Tomusky dynç alyş möwsüminde Balkan welaýatyna ulag gatnawlarynyň sany artdyrylar

1-nji maýda Prezident Serdar Berdimuhamedow Balkan welaýatynda geçiren Ministrler Kabinetiniň giňişleýin göçme mejlisinde tomusky dynç alyş möwsümine taýýarlyk bilen bagly meselelere garalyp geçildi.

Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew taýýarlyk işleriniň çäklerinde ýerine ýetirilýän işler barada aýdyldy. Bellenilişi ýaly, agentlige degişli myhmanhanalarda dynç alýanlary kabul etmek we olara ýokary hilli hyzmat etmek boýunça degişli çäreler görülýär. Möwsümde ýolagçy otly gatnawlarynyň tassyklanan tertibinden başga-da, Aşgabat — Türkmenbaşy — Aşgabat ugry boýunça goşmaça ýolagçy gatnawlaryny guramak, Balkanabat Halkara howa menzili — Türkmenbaşy, Türkmenbaşy demir ýol menzili — Awaza we Aşgabat — Awaza ugurlary boýunça yzygiderli awtobus hem-de Aşgabat, Daşoguz, Mary, Türkmenabat, Kerki Halkara howa menzillerinden Balkanabat Halkara howa menziline täze ýolagçy howa gatnawlaryny ýola goýmak, gatnawlaryň sanyny artdyrmak meýilleşdirilýär.