Ýaponiýada Nippon Telegraph and Telephone (NTT) kompaniýasy tarapyndan döredilen ýyldyrym urgusyny sowýan dronlaryň synaglary geçirildi. Bu barada guramanyň saýtynda habar berilýär.
Synaglar 2024-nji ýylyň dekabryndan 2025-nji ýylyň ýanwary aralygynda 900 metr belentlikde Hamada şäheriniň golaýyndaky daglarda geçirildi. Dronlar ýyldyrymy özüne çekmegi üçin tupan bulutlary golaýlan ýagdaýynda uçuryldy.
Işläp düzüjileriň aýtmagyna görä, dronlar ilkinji gezek elektrik meýdanynyň üýtgemeleriniň kömegi bilen ýyldyrymy özüne gönükdirip bildi. Urgudan soň dronlar abat galdy we hiç zat bolmadyk ýaly işini dowam etdirdi. Kompaniýa muňa ýyldyrym urmasyndan ýörite goragyň kömek edendigini belleýär.
NTT şeýle dronlaryň geljekde şäheri we infrastrukturany ýyldyrym urmalaryndan goramagyna bil baglaýar. Adaty ýyldyrymy sowujylardan tapawutlylykda, dronlar hereket edip bilýär. Bu hem olara howpa has takyk jogap berip, ýyldyrymyň ýaşaýyş jaýlaryna we beýleki möhüm desgalara düşmek töwekgelçiligini azaldýar.
“Ýyldyrymlar henizem zyýan ýetirýär, diňe Ýaponiýada ol ýylda 100 – 200 mlrd ýena (takmynan, 700 mln – 1,4 mlrd dollar) bilen bahalandyrylýar” – diýip, NTT belledi.
Geljekde kompaniýa ýyldyrymlaryň peýda boljak ýeriniň çaklamasyny kämilleşdirmegi hem-de dronlar ulgamyny döwrebaplaşdyrmagy meýilleşdirýär. Şeýle-de, kompaniýa ýyldyrymdan alnan energiýany saklamak mümkinçiligini öwrenmek isleýär.
