2025-nji ýylyň 11-nji aprelinde Türkmenistanyň Ylymlar akademiýasynyň Halkara ylmy-tehnologiýa parkynda “Ylym, tehnologiýa we parahatçylyk: durnukly ösüşe barýan ýollar” atly gibrid görnüşli halkara ylmy maslahat geçiriler.
Halkara maslahata Eýrandan, Germaniýadan, Türkiýeden, Birleşen Arap Emirliklerinden, Hytaý Halk Respublikasyndan, Özbegistandan wekilleriň gelmegine, Russiýa Federasiýasynyň wekilleriniň sanly ulgam arkaly gatnaşmagyna garaşylýar. Şeýle hem Türkmenistanyň alymlarynyň çykyşlary göz öňünde tutulýar.
Jemi 90-dan gowrak çykyşlar meýilleşdirilýär.
Ylmy maslahatyň işi umumy mejlisde we bölümlerde alnyp barlar. Bölümler şulardan ybarat:
- Himiki tehnologiýalar we ekologiýa;
- Nanotehnologiýalar we energetika;
- Bio-, iýmit we derman serişdelerini öndürmegiň tehnologiýalary;
- Maglumat-aragatnaşyk we geografiki maglumat ulgamlary tehnologiýalary;
- Innowasion ykdysadyýet.
Maslahat ylym we tehnologiýa boýunça gazanylan netijeleri, olaryň önümçilige ornaşdyrylyşyny, parahatçylyga we ösüşe ýetmekde ylmyň we tehnologiýalaryň möhüm ornuny, ylmyň we tehnologiýalaryň gündelik durmuşa edýän täsirini açyp görkezmegi maksat edinýär.
