22-nji martda Prezident Serdar Berdimuhamedowyň gatnaşmagynda ýurdumyzda ählihalk bag ekmek dabarasy geçirildi.
Dabara Mejlisiň Başlygy, wise-premýerler, harby we hukuk goraýjy edaralaryň, ministrlikleriň, pudaklaýyn dolandyryş edaralarynyň, daşary döwletleriň we halkara guramalaryň ýurdumyzdaky wekilhanalarynyň ýolbaşçylary hem-de wekilleri, şeýle hem halk köpçüligi gatnaşdy.
Döwlet Baştutany ählihalk bag ekmek dabarasynyň geçirilýän ýeri bolan paýtagtymyzyň günorta künjegine geldi.
Serdar Berdimuhamedow ýörite taýýarlanylan ýerde bag nahalyny oturdyp, ählihalk bag ekmek dabarasyna badalga berdi.
Çäräniň dowamynda Serdar Berdimuhamedow käbir wise-premýerler bilen gürrüňdeş boldy.
Wise-premýer T.Atahallyýew tutuş ýurdumyzda ýaýbaňlandyrylan ählihalk bag ekmek dabarasynyň barşy barada hasabat berdi.
Wise-premýer B.Annamämmedow baş şäherimizi abadanlaşdyrmak, onuň çäklerinde arassaçylyk işlerini geçirmek babatda ýerine ýetirilýän işler, paýtagtymyzda alnyp barylýan gurluşyk işleri barada hasabat berdi.
Şeýle hem çäräniň çäklerinde ýurdumyzdaky diplomatik wekilhanalaryň gatnaşmagynda “Dünýäniň aşhanalary” atly halkara aşpezlik bäsleşigi geçirildi.
Bu ýerde Prezident Serdar Berdimuhamedow dürli ýurtlaryň halklarynyň aşhanasynyň birnäçe tagamlaryny taýýarlamagyň usullary we aýratynlyklary bilen gyzyklandy.
Bäsleşige gatnaşyjylar döwlet Baştutanyny milli aşhanalar üçin däp bolan tagamlaryň aýratynlyklary bilen tanyşdyrdylar.
Şeýle hem bäsleşigiň çäklerinde türkmen aşhanasynyň dürli tagamlary bilen tanyşdyryldy.
