3-nji mart Türkmenistanyň Halk Maslahatynyň Başlygy Gurbanguly Berdimuhamedow Katar Döwletiniň Emiri Şeýh Tamim bin Hamad Al-Tani bilen telefon arkaly söhbetdeş boldy.
“Watan” habarlar gepleşiginde habar berlişi ýaly, söwda-ykdysady gatnaşyklar ikitaraplaýyn hyzmatdaşlygyň örän möhüm ugry bolup durýar.
Şunuň bilen baglylykda, Gurbanguly Berdimuhamedow nebitgaz, himiýa we dokma senagaty, maýa goýumlary, ulag we söwda ulgamlary boýunça hyzmatdaşlygyň Türkmenistan bilen Katar Döwletiniň arasyndaky gatnaşyklaryň geljegi uly bolan ugurlaryna öwrüljekdigini belledi.
Türkmen halkynyň Milli Lideri bu ugurlarda bar bolan mümkinçiliklere we toplanan oňyn tejribä esaslanyp, özara bähbitli taslamalaryň durmuşa geçirilmeginiň gazanyljakdygyna ynam bildirdi.
Gurbanguly Berdimuhamedow 2025-nji ýyly – “Halkara parahatçylyk we ynanyşmak ýylyny” mynasyp derejede dabaralandyrmak üçin goňşy ýurtlar we halkara guramalary bilen dürli syýasy çäreleri geçirmek boýunça işleriň alnyp barylýandygyny aýtdy.
Türkmenistanyň Halk Maslahatynyň Başlygy hemişelik Bitaraplygynyň 30 ýyllygynyň belleniljek gününde - 2025-nji ýylyň 12-nji dekabrynda Aşgabatda Halkara parahatçylyk we ynanyşmak forumynyň geçiriljekdigini aýtdy hem-de Emir Şeýh Tamim bin Hamad Al-Tanini şol halkara forumyna we baýramçylyk çärelerine gatnaşmaga uly hormat bilen çagyrdy.
