Ýaponiýanyň paýtagtynda dünýäniň iň kiçi seýilgähi peýda boldy we resmi taýdan Ginnesiň rekordlar kitabyna girdi. Onuň meýdany bary-ýogy 0,24 inedördül metr. Bu iki sany A3 ölçegdäki kagyzyň ululygyndan geçmeýär.
Seýilgähde "seýilgäh" bolmak üçin ähli zat bar - kiçijik dyzeper, az-owlak ot we girelge.
Bu kiçijik seýilgähiň taryhy 1988-nji ýyldan başlanýar. Şonda Nagaizumi şäher häkimliginiň gurluşygy dolandyryş bölüminiň işgärlerinden biri ABŞ-nyň Oregon ştatynyň Portlend şäherine dynç almaga ugraýar we ol ýerde Mill Ends atly kindiwanja seýilgähi görýär. Bu seýilgäh ("dünýäniň iň kiçi seýilgähi" adynyň öňki eýesi) diametri 61 sm bolan tegelekdi we merkezinde ýekeje agaç bardy. Öýüne gaýdyp gelensoň, ol dogduk şäherinde ondanam kiçi seýilgähi döretmegi teklip edýär.
Şondan bäri Nagaizumidäki seýilgäh kiçijik göwrümi bilen meşhur boldy we ýerli ýaşaýjylaryň hem-de jahankeşdeleriň ünsüni özüne çekdi. Indi şäherde seýilgähiň adyny resmi taýdan bellige aldyrmak kararyna geldiler we ony Ginnesiň rekordlar kitabyna girizmek maksady bilen, tutýan meýdanyny takyk ölçemek we ähli zerur maglumatlary ýygnamak üçin geodeziýa işgärini çagyrdylar. Netijede, seýilgäh köpden bäri garaşylan derejesini aldy.
