25-nji fewralda Aşgabatdaky «Arçabil» myhmanhanasynda «Türkmenistanda söwda amallaryny ýönekeýleşdirmek boýunça milli Ýol kartasyny işläp düzmek» atly bilermenler duşuşygy geçirildi.
Duşuşyk Halkara söwda merkezi tarapyndan durmuşa geçirilýän we Ýewropa Bileleşigi tarapyndan maliýeleşdirilýän «Türkmenistan: söwdanyň durnuklylygy we integrasiýasy» taslamasynyň çäklerinde guraldy.
Maslahata söwda amallaryny ýönekeýleşdirmek boýunça halkara bilermen-maslahatçylary, Türkmenistanyň ministrlikleriniň, edaralarynyň we işewür toparlarynyň wekilleri gatnaşdy.
Bilermenleriň maslahatyna Türkmenistanyň Oba hojalyk ministrliginiň ýanyndaky Döwlet weterinar gullugynyň Halkara we ylmy gatnaşyklary bölüminiň başlygy Arslan Soltanmyradow gatnaşdy. Ol öz çykyşynda weterinariýa gözegçiligini optimizirlemek, eksport-import we üstaşyr amallaryny ýeňilleşdirmek maksady bilen “Bir penjire” mehanizmini ornaşdyrylmagynyň uly ähmiýetini nygtady. Weterinar şahadatnamalarynyň we beýleki rugsat beriji resminamalaryň sanly ulgama integrasiýa edilmegi arzalaryň ýerine ýetirilmegini çaltlandyrmaga, administratiw päsgelçilikleri azaltmaga we amallaryň aç-açanlygyny ýokarlandyrmaga mümkinçilik berdi. Bu bolsa halkara söwdasynyň ösmegine we öňdebaryjy talaplara laýyk gelmegine möhüm ädim boldy.
Duşuşyk interaktiw görnüşde geçirilip, oňa gatnaşyjylara Türkmenistanda serhetara söwdanyň ähli gatnaşyjylarynyň bähbitlerini göz öňünde tutup, söwda amallaryny ýönekeýleşdirmek boýunça milli ýol kartasyny işläp düzmegiň iň oňaýly ýollary barada pikir alyşmaga mümkinçilik berdi.
