21-nji fewralda Aşgabatda Ýaponiýanyň Türkmenistanyň ilçihanasynyň guramagynda Ýaponiýanyň imperatory Naruhitonyň doglan güni mynasybetli dabaraly kabul edişlik geçirildi. Imperator 23-nji fewralda 65 ýaşady.
Kabul edişlige Türkmenistanyň daşary işler ministri Raşid Meredow, diplomatlar, halkara guramalaryň we işewür toparlaryň wekilleri gatnaşdy.
Ýaponiýanyň Türkmenistanyň Adatdan daşary we Doly ygtyýarly ilçisi Sasaki Hiroşi iki ýurduň arasyndaky dostlukly we hyzmatdaşlyk gatnaşyklarynyň ähmiýetini nygtap geçdi. Ol Osaka şäherinde EKSPO-2025 Bütindünýä sergisiniň açylyşynyň çäklerinde, şu ýylyň aprelinde Türkmenistanyň Prezidenti Serdar Berdimuhamedowyň Ýaponiýa amala aşyrjak sapary barada aýratyn durup geçdi.
Raşid Meredow Türkmenistanyň ýolbaşçylarynyň adyndan ýapon tarapyna gutlaglary gowşurdy we bu ýylda iki ýurduň diplomatik gatnaşyklarynyň 33 ýyllyk şanly senesiniň bellenilýändigini aýtdy. Ol şeýle hem Kawasaki, Mitsubishi we Toyota ýaly iri ýapon kompaniýalary bilen işleşmek arkaly türkmen-ýapon hyzmatdaşlygynyň ýokary netijelerini belläp geçdi.
Dabarada şeýle hem Ýaponiýanyň sungat ussatlary Ueda Çiho we Kikuçi Ýutaka çykyş etdiler. Olaryň çykyşlary Döwletmämmet Azady adyndaky Türkmen milli dünýä diller institutynyň we Türkmenistanyň milli konserwatoriýasynyň wekilleri bilen bilelikde geçirildi.
Çäräniň çäginde Ýaponiýanyň sungat ussatlary Aşgabatda Türkmenistanyñ talyplary üçin birnäçe ussatlyk sapaklaryny geçdiler.
Ýaponiýada imperator Naruhitonyň doglan güni möhüm milli baýram hökmünde bellenilýär. Mundan öň, Türkmenistanyň Prezidenti Ýaponiýanyň imperatoryna bu möhüm sene mynasybetli gutlaglaryny iberip, ikitaraplaýyn netijeli we özara bähbitli hyzmatdaşlygyň dowam etjekdigine ynam bildirdi.
