Saud Arabystanynyň Kiddiýa şäher seýilgähinde meýdany 376 inedördül kilometr bolan Six Flags tematiki seýilgähiniň gurluşygy tamamlanyp barýar. Onuň çäginde dünýäde iň tiz we iň beýik amerikan demirýol depejikleri (roller coaster) peýda bolar diýip, The Sun ýazýar.
Falcon’s Flight attraksiony dünýäde iň tizi we iň beýigi bolar. Onuň uzynlygy 4 km töweregi bolup, iň ýokary beýikligi 195 metre ýeter. Wagonjyklar tizligini 250 km/sag çenli artdyryp biler, aşak gaýtmalaryň biri bolsa depeden 158 m beýiklikden bolar. Oňa birbada 14 adam ýerleşip biler, wagonlar ýelden we çägeden goramak üçin egri aýnalar bilen üpjün ediler.
Häzirki wagtda bu amerikan depejiginde tizlik rekordy Ýakyn Gündogaryň başga bir ýurduna degişli – Ferrari World Abu Dhabi seýilgähindäki wagonjyklar tizligini 240 km/sag çenli artdyrýar.
Six Flags seýilgähiniň açylyşy 2025-nji ýylyň ahyryna meýilleşdirilýär, ýöne takyk sene heniz yglan edilmedi. Onda, umuman alanyňda, 28 attraksion ýerleşer.
