Russiýanyň «Rosteh» döwlet korporasiýasy iň täze işläp düzen enjamyny – «ANT 1000PM» atly robotyny tanyşdyrdy. Bu täsin robot ýangyn söndürijileriň janyna howp salýan aşa kyn şertlerde ýangyna garşy göreşmek üçin niýetlenendir.
Robotyň synaglary Russiýanyň Adatdan daşary ýagdaýlar ministrligine (МЧС России) degişli WNIIPO Federal döwlet býujet institutynyň (ФГБУ ВНИИПО) Orenburg şäherindäki şahamçasynda geçirildi. Operator tarapyndan uzakdan dolandyrylan robot geçirilen synagda ýangyny üstünlikli öçürmegi başardy. Bu barada «Rosteh» döwlet korporasiýasynyň «Высокоточные комплексы» (Takyk toplumlar) holdinginiň Telegram kanalynda habar berildi.
Daşky görnüşi boýunça robot gyzyl reňkli ýük göteriji lifti ýada salýar. Robotyň kranynyň hereket edýän tirkeg bölegine suw-ýelim garyndyly ežektor nasadkaly ätiýaçlyk çelegi ýerleşdirildi. Bu enjam oduň üstüne 60 metre çenli suw sepmäge mümkinçilik berýär.
Mundan başga-da ýangyn söndürýän robot manipulýatorlar arkaly weýran bolan ýeri arassalap bilýär, bu bolsa ýangynyň netijelerini çalt aradan aýyrmaga ýardam berýär.
Daşky kameralary we datçikleri (duýujy enjamlary) wakanyň bolan ýerindäki ähli jikme-jikleri doly habar berip berýär, bu bolsa ýangyn bilen göreşde ony çalşyp bolmajak kömekçä öwürýär.
