11-nji fewralda Türkmenistanyň wise-premýeri, daşary işler ministri Raşid Meredowyň ýolbaşçylygyndaky türkmen wekiliýeti Eýran Yslam Respublikasynyň paýtagty Tährana iş sapary bilen bardy.
Türkmenistanyň DIM-niň habar bermegine görä, şol gün türkmen wekiliýeti Eýran Yslamnyň Ýollar we şähergurluşyk ministriniň orunbasary, Ulag senagaty we ösüş kompaniýasynyň ýolbaşçysy Huşang Bazwand bilen duşuşdy. Duşuşygyň dowamynda taraplar özara hyzmatdaşlygyň oňyn tejribesini, şol sanda eýran kompaniýalarynyň Türkmenistanyň çägindäki awtomobil ýollarynyň gurluşygy boýunça taslamalara gatnaşmagyny bellediler.
Iki ýurduň arasyndaky hyzmatdaşlygy giňeltmäge özara gyzyklanma bildirildi.
Soňra Eýranyň nebit ministri Mohsen Paknežat bilen duşuşyk geçirildi. Duşuşykda nebitgaz pudagyndaky hyzmatdaşlygyň möhüm meseleleri we geljekki mümkinçilikleri ara alnyp maslahatlaşyldy. Taraplar iki dostlukly ýurduň mümkinçilikleriniň giňdigini bellediler.
Mundan başga-da, Türkmenistanyň wekiliýeti Eýranyň energetika ministri Abbas Aliabadi bilen duşuşdy. Taraplar geçen ýylyň dowamynda geçirilen gepleşikleriň netijeliligini bellediler we iki ýurduň hyzmatdaşlygy işjeňleşdirmäge taýýardygyny tassykladylar. Duşuşykda elektroenergetika, suw serişdeleriniň netijeli ulanylmagy babatynda hyzmatdaşlygyň häzirki ýagdaýy we geljegi ara alnyp maslahatlaşyldy.
Bu ugurda Türkmenistanyň we Eýranyň degişli edaralarynyň arasynda utgaşykly iş alyp barmagyň ähmiýeti nygtaldy.
Türkmenistanyň wekiliýetiniň Eýrana sapary dowam edýär.
