9-njy fewralda Arkadag şäheriniň Görogly adyndaky döwlet atçylyk sirkinde Türkmenistanyň Halk Maslahatynyň Başlygynyň tabşyrygy boýunça «Galkynyş» milli at üstündäki oýunlar toparynyň agzalaryna bilelikde düşülen uly ölçegdäki fotosurat gowşuryldy hem-de Gahryman Arkadagymyzyň iberen mähirli salamy ýetirildi.
Mälim bolşy ýaly, Halkara parahatçylyk we ynanyşmak ýylynyň ilkinji aýynda toparyň agzalary ajaýyp ahalteke atlary bilen Monakonyň Monte-Karlo şäherinde geçirilen halkara sirk sungaty festiwalynda üstünlikli çykyş edip, Altyn baýraga we beýleki ýörite baýraklara mynasyp boldular.
Bu abraýly baýraklary alyp, ata Watanymyza ýeňişli dolanyp gelen türkmen jigitleri bilen Gurbanguly Berdimuhamedowyň hut özüniň duşuşmagy we gazanylan üstünlik bilen gutlamagy olaryň buýsançly başyny göge ýetirdi. Arkadag şäheriniň Görogly adyndaky döwlet atçylyk sirkinde bolan şol duşuşykda türkmen halkynyň Milli Lideri toparyň agzalaryna mundan beýläk-de uly üstünlikleri gazanmagy, ajaýyp ýeňişleri arzuw etdi we Hanbeg atly bedewiň üstünde olar bilen ýadygärlik surata düşdi.
Belläp geçsek, 2007-nji ýylda döredilen «Galkynyş» milli at üstündäki oýunlar topary dürli ýurtlarda geçirilen halkara sirk festiwallarynda 5 gezek baş baýraga mynasyp bolup, dünýä çempiony diýen belent derejä eýe boldy.
