Hytaý 2026-njy ýylda Aýa bir bökende onlarça kilometri geçmäge ukyply bolan zondy ibermegi meýilleşdirýär. Täze “Çane-7” enjamy Ýeriň hemrasynyň Günorta polýusynda suw gözlär. Bu barada Hytaýyň Merkezi telewideniýesine salgylanyp, RIA Nowosti habar berýär.
Alty aýakly bu enjam süýrenmek, bökmek hem-de raketa çekiş güýjüniň kömegi bilen uçmak mümkinçiliklerine eýe bolar. Şeýle aýratynlyklar oňa Aýyň barmasy kyn bolan ýerlerini, şol sanda çuň kraterleri we beýikli-pesli ýerleri öwrenmäge mümkinçilik berer.
“Edil beýiklikden bökýän adam ýaly, zond hem dürli ýerlerde ygtybarly we ençeme gezek gonup biler” – diýip, missiýanyň baş konstruktory Tan Ýuýhua belledi.
“Çane-7” missiýasy buz gözlegine-de gönükdiriler. Şeýle çeşmeler Aýa suw eltmegiň bahasyny we wagtyny azaldar, bu hem geljekde Ýeriň tebigy hemrasyny özleşdirmek üçin şertleri döretmäge kömek eder.
2007-nji ýylda “Çane-1” Aý hemrasynyň uçurylmagy bilen başlanan “Çane” taslamasy birnäçe tapgyry öz içine alýar. Täze zond Hytaýyň Aý maksatnamasynyň dördünji tapgyrynyň bir bölegi bolar.
