Microsoft emeli aňyň gündelik durmuşyň we saglygy goraýşyň dürli ugurlaryna edýän täsirini öwrenjek Advanced Planning Unit (APU) bölüminiň döredilendigini habar berdi.
Bölüme Microsoft AI-niň baş direktory Mustafa Süleýman ýolbaşçylyk eder. APU dürli ugurlar boýunça hünärmenleri, şol sanda ykdysatçylary we psihologlary birleşdirer. Olar AI-niň durmuşa ornaşdyrylmagynyň oňyn we negatiw taraplaryny seljererler. Bölümiň agzalary kompaniýanyň ýolbaşçylary üçin analitiki brifingleri we materiallary taýýarlarlar.
Hasabata görä, Microsoft-yň 2024-nji ýylyň dördünji çärýeginde esasy çykdajylary rekord 22,6 milliard dollar boldy. Baş müdir Satýa Nadella bu maýa goýumlarynyň bulut hyzmatlaryna we AI esasly çözgütlere barha artýan islegi kanagatlandyrmaga gönükdirilendigini nygtady.
Nadella, AI-niň netijeliligi artdygysaýy, tehnologiýa bolan islegiň çalt ösjekdigini çaklaýar. Geljek ýyl kompaniýa bazardaky üýtgeşmelere üstünlikli uýgunlaşmaga mümkinçilik berjek, emeli aň modellerine esaslanýan programmalary ösdürmäge ünsi jemlär.
