Bennu asteroidinden alnan nusgalarda geçirilen barlag DNK-ny we RNK-ny emele getirmek üçin zerur bolan bäş sany azot bazasynyň bardygyny anyklady. Bu açyş Ýerdäki ýaşaýşyň gelip çykyşyny öwrenmekde möhüm ädim boldy.
Barlag NASA-nyň Goddard adyndaky Kosmos merkeziniň Daniel Glawiniň we Jeýson Dworkiniň ýolbaşçylygyndaky halkara alymlar topary tarapyndan geçirildi. Barlagyň netijelerini Nature Astronomy žurnalynda paýlaşdylar.
Asteroidden alnan nusgalar Ýere 2023-nji ýylyň sentýabr aýynda 121,6 gram maddany ýygnan OSIRIS-REx missiýasy tarapyndan getirildi. Hapalanmagynyň öňüni almak üçin material azotly gurşawda saklandy. 17,75 mg maddanyň derňewi mass-spektrometriýanyň kömegi bilen Kýusýu uniwersitetinde geçirildi.
Bennuda N-geterosiklleriň konsentrasiýasynyň ozal Rýugu asteroidinden alnyp öwrenilen nusgadakydan 5-10 esse ýokarydygy anyklandy. Alymlar bäş sany esasy nuklein esasly kislotadan, ýagny adeninden, guaninden, sitosinden, timinden we urasilden başga-da, ksantini, gipoksantini we nikotin kislotasyny (B3 witamini) hem tapdylar.
Alnan maglumatlar asteroidleriň himiki düzümi we kosmosdaky organiki birleşmeleriň döreýşi bilen bagly has giňişleýin barlaglarda kömek eder.
