Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 17-si hasaba alyndy. Bu barada «Türkmenistan» gazetinde habar berildi.
Bellenilişi ýaly, Birleşen Arap Emirlikleriniň, Türkiýäniň telekeçileri «Türkmenhimiýa» döwlet konserniniň kärhanasynda öndürilen karbamidi satyn aldylar. Mundan başga-da, Birleşen Arap Emirlikleriniň, Gyrgyzystanyň telekeçilerine jins önümleri, pagta süýümi ýerlenildi. Geleşikleriň jemi bahasy ABŞ-nyň 18 million 21 müň dollaryndan gowrak boldy.
Ýurduň işewürleri içerki bazar üçin jemi bahasy 38 million 303 müň manatdan gowrak bolan nebit ýol bitumyny, binýatlyk ýagy, polipropileni («Türkmennebit» döwlet konserni), nah ýüplügi, dokma önümleriniň galyndylaryny satyn aldylar.
