Sosial torlaryň adam saglygyna uly täsiri bar we olaryň yzygiderli ulanylmagy gaharjaňlyga sebäp bolup bilýär. ABŞ-ly alymlar, 42 müňden gowrak uly ýaşly ýaşaýjynyň gatnaşmagynda geçirilen «Covid State Project» atly soragnamanyň maglumatlaryny seljerip, şeýle netijä geldiler. Barlagyň netijeleri, JAMA Network Open žurnalynda çap edildi.
Barlagyň netijelerine görä, sosial torlary ýygy-ýygydan ulanmak bilen gaharjaňlygyň ýokarlanmagynyň arasynda arabaglanyşyk bar. Soragnama gatnaşan 42597 sany uly ýaşly adamyň (ortaça ýaş – 46, şolardan 58,5%-i zenan) gaharjaňlyk derejesini ölçemek üçin BITe synagyndan (Brief Irritability Test, ýagny gysgaça gaharjaňlyk synagyndan) geçirildi.
Gatnaşyjylaryň takmynan 80%-i günüň dowamynda hökman bir gezek sosial tora girýändigini mälim etdi. Şolaryň 14,2%-i sosial torlara günde bir gezek girýän bolsa, 39,2%-i birnäçe gezek girýär, 24,9%-i bolsa gününiň köp bölegini şol ýerde geçirýär.
Netijeler, sosial torlary ýygy ulanmagyň BITe derejesine görä (5-30 bal) gaharjaňlygyň ýokarlanmagy bilen baglanyşyklydygyny görkezdi. Sosial torlara iň köp girýän ulanyjylaryň gaharjaňlyk derejesi sosial torlary ulanmaýanlara garanyňda 3,37 bal ýokary bolupdyr. Sosial torlara günde diňe bir gezek girýänleriň gaharjaňlyk derejesi bolsa 1,43 bal ýokary bolupdyr.
Barlagy alyp baran alymlar, sosial torlaryň gaharjaňlyga «sebäp» bolýandygyny anyk aýdyp bilmeseler-de, gaharjaň ulanyjylaryň sosial torlara has köp girýändigini öňe sürýärler.
Barlagyň awtorlary, psihikanyň dynç almagy üçin sosial torlary az ulanmagy we emosional reaksiýalara has ünsli bolmagy maslahat berýärler.
