Mongoliýanyň çäklerinde Gobi çölüniň günbatar böleginde äpet dinozawrlaryň daşa öwrülen yzlary tapyldy. Yzlaryň ini 92 sm-e barabar. Tapyndy bu sebitlerde, ähtimal, tirannozawrdan hem ulurak bolan ägirt zaurolofyň ýaşap geçendigine şaýatlyk edýär diýip, Okaýama ylym uniwersitetiniň metbugat gullugy habar berýär.
Ýaponiýaly we mongoliýaly alymlaryň bilelikdäki ekspedisiýasy Gobi çölüniň günbatar böleginde rekord ululykdaky daşlaşan yzlary ýüze çykardylar. Iň uly yzyň ini 92 sm bolup, ol ot-iým bilen iýmitlenen gadrozawrlar maşgalasyna degişlidir diýip çaklaýarlar. Alymlaryň çaklamalaryna görä, yzlar 15 metrden hem uzyn bolan ägirt uly zaurolofa, ýagny dünýä taryhynda ýaşap geçen iň uly iki aýakly haýwanlaryň birine degişli bolup biler.
Ekspedisiýanyň gazuw-agtaryş işleriniň dowamynda, 24 metre çenli uzalyp gidýän aralykda 13 sany yzly-yzyna ýerleşýän, ini 85 sm bolan yzlar hem tapyldy. Bu tapyndy alymlara ägirt uly dinozawrlaryň ýöreýşini we özlerini alyp baryşlaryny jikme-jik öwrenmäge mümkinçilik berýär.
«Tapylan yzlar bize bu jandarlaryň durkuny, ýöreýiş stilini we toparlaýyn özlerini alyp baryşlaryny seljermek üçin deň-taýsyz mümkinçilik berýär – bu maglumatlary diňe süňkleri seljermek arkaly öwrenip bolmaýar» diýip, Okaýama ylym uniwersitetiniň Dinozawr barlaglary muzeýiniň müdiri Şinobu Işigaki metbugat beýannamasynda belledi.
