Peruwyň paleontologlary häzirki uly ak akulanyň ata-babasynyň doly diýen ýaly saklanan skeletini tapdy. Ol, takmynan, 9 mln ýyl mundan ozal ýaşapdyr diýip, Reuters agentligi ýazýar.
Cosmopolitodus Hastalis akulasynyň galyndysy Limadan günortada, Pisko derýasynyň basseýninde tapyldy. Bu ýerde gadymy deňiz görnüşleriniň galyndylary köp duş gelýär.
Tapylan akulanyň uzynlygy diri wagtynda ýedi metre ýetip, dişleri 8,9 sm çenli ösüpdir. Paleontologiki maglumatlar bu görnüşiň Ýuwaş ummanyň günorta böleginiň suwlarynda ýaşandygyny delillendirýär. Balygyň galyndylary şeýle bir gowy saklanypdyr welin, alymlar onuň aşgazanynda köp sanly sardinalary tapdy. Olar ýyrtyjynyň esasy iýmiti bolan bolsa gerek.
“Dünýäde bitin akula galyndylary o diýen kän däl” – diýip, paleontolog Mario Urbina belledi.
Cosmopolitodus Hastalis-iň daşa öwrülen galyndylary gadymy döwürde giňden ýaýrandygy sebäpli dünýäniň dürli ýerlerinde tapyldy. Onuň, takmynan, bir million ýyl mundan ozal ýok bolmagy bu wagşy deňiz jandarlarynyň döwrüniň soňlanandygyny görkezdi.
Bellenilişi ýaly, onuň ýok bolup gitmeginiň sebäpleri mälim bolmasa-da, onuň akulalaryň beýleki görnüşleriniň döremegine sebäp bolandygy çaklanylýar.
