20-nji ýanwarda Monako saparynyň çäklerinde Türkmenistanyň Halk Maslahatynyň Başlygy Gurbanguly Berdimuhamedow Monako Knýazlygynyň Şazadasy Alber II bilen duşuşdy.
Monakonyň Şazadasynyň köşgünde Gurbanguly Berdimuhamedow Monako Knýazlygynyň Şazadasy Alber II hem-de Şagyzy Stefaniýa bilen bilelikde ýadygärlik surata düşdi. Soňra ikiçäk we iki ýurduň wekiliýetleriniň gatnaşmagynda giňişleýin düzümde duşuşyklar geçirildi.
Şazada Alber II Türkmenistanyň häzirki döwrüň möhüm meselelerini çözmekde öňe sürýän halkara başlangyçlarynyň ähmiýetini nygtap, ýurdumyzyň parahatçylyk döredijilik syýasatynyň Monakoda goldanylýandygyny belledi.
Gurbanguly Berdimuhamedow Türkmenistanyň öňe süren halkara başlangyçlaryny goldaýandygy üçin Monako Knýazlygyna minnetdarlyk bildirdi.
Türkmen halkynyň Milli Lideri Gurbanguly Berdimuhamedow Şazada Alber II-ni Halkara parahatçylyk we ynanyşmak ýylyna bagyşlanan foruma gatnaşmak üçin Aşgabada çagyrdy.
Türkmenistanyň Halk Maslahatynyň Başlygy Monakonyň “gök başlangyjyny” durmuşa geçirip, Monako Knýazlygynyň Şazadasy Alber II ýolbaşçylygyndaky gaznanyň suw gurşawynda ummanlary we bioköpdürlüligi goramak ugrunda köp işleri durmuşa geçirýändigini belledi hem-de Türkmenistanyň bütin dünýäde howanyň ýagdaýy boýunça gün tertibiniň şu we beýleki ugurlarynda özara hyzmatdaşlygyň mümkinçiliklerini öwrenmäge taýýardygyny tassyklady.
Gurbanguly Berdimuhamedow söwda-ykdysady ulgam barada aýdyp, hususy telekeçilikde, syýahatçylyk we maliýe ulgamlarynda uly mümkinçilikleriň bardygyny aýtdy hem-de hyzmatdaşlyk we iş gatnaşyklary üçin usullary döretmek mümkinçiligine seretmegi teklip etdi.
Duşuşygyň barşynda Aşgabat şäheriniň “Arkalaşygyň täze sport mümkinçilikleriniň şäheri” diýlip yglan edilendigi, Monako Knýazlygynyň bolsa 2025-nji ýylda Dünýäniň sport paýtagty diýen hormatly ada eýe bolandygy bellenildi. Şunuň bilen baglylykda, bu möhüm ugurdaky tagallalary birleşdirmek üçin ýurtlarymyzda bar bolan sporty, mümkinçilikleri we tejribäni ösdürmek üçin usullary ulanmagy teklip etdi.
Giňişleýin düzümdäki duşuşyk tamamlanandan soňra sowgatlary alyşmak dabarasy boldy.
Soňra Türkmenistanyň Halk Maslahatynyň Başlygy Monakonyň Şazadasynyň Köşgüniň Hormatly myhmanlar kitabynda ýadygärlik ýazgy galdyrdy.
