Alymlar ölüm howply ýylan zäherlerini zyýansyzlandyrýan beloklary döretmek üçin ilkinji gezek emeli aňdan peýdalandylar diýip, EurekAlert habar berýär.
Waşington uniwersitetiniň lukmançylyk fakultetiniň (UW Medicine) hünärmenleri, kaliforniýaly we daniýaly kärdeşleri bilen bilelikde, maşyn öwrenmesi tehnologiýasy arkaly mamby, kobra we beýleki elapid ýylanlarynyň zäherlerinde bar bolan “üç barmak zäher” (three-finger toxin, 3FTx) atly toksini bloklaýan beloklary işläp düzdiler.
Bu beloklar toksinlere birikýär we olaryň bedene zeper ýetirmeginiň, ysmaz etmeginiň öňüni alýar. Syçanlarda geçirilen synaglar bu usulyň täsirli netije berýändigini görkezdi.
Häzirki wagtda zähere garşy maddalar haýwanlaryň immunizasiýasy arkaly alynýar, bu usul birnäçe aý wagt alýar we gaty gymmata düşýär. Emeli aň bu işi has çalt we arzan edip, dermanlaryň hilini hemişe ýokary saklamaga mümkinçilik berýär.
Ýylanlaryň çakmagy bilen bagly meseleler her ýyl (esasan Afrika, Aziýa we Latyn Amerikasy ýurtlarynda) millionlarça adama zyýan ýetirýär. Alymlar tarapyndan eýýäm patentlenen bu usul zäherli çakmalara garşy göreşde möhüm ädim bolup biler.
Alymlar bu tehnologiýanyň beýleki howply keseller üçin hem derman işläp taýýarlamaga kömek etjekdigine ynanýarlar.
