Dünýädäki awiakompaniýalaryň hiline we iş tizligine baha bermäge ýöriteleşen AirHelp kompaniýasy pudagyň iň gowy we ýaramaz wekilleriniň täze reýtingini hödürledi. Reýting 2024-nji ýylyň ýanwaryndan oktýabry aralygyndaky döwürde 109 awiakompaniýanyň işiniň seljermesine esaslanýar.
Reýtingi düzüjiler 54-den gowrak ýurtdan müňlerçe awiaýolagçydan awiakompaniýalaryň gatnawlarynda hyzmatyň hiline baha bermegi soradylar. Şeýle-de, hünärmenler gatnawlaryň ýerbe-ýerligini we awiakompaniýalaryň nägileliklere nähili çemeleşýändigini, olaryň ýolagçylara kompensasiýa tölemek ähtimallygyny hem göz öňünde tutdular. Bularyň ählisi 10 bal şkala boýunça bahalandyryldy.
Sanawda birinji orny Belgiýanyň 8,12 bal alan Brussels Airlines awiakompaniýasy eýeledi. Onuň yzyndan Qatar Airways (8,11) we United Airlines (8,04) gelýär.
Şeýle-de, iň gowy awiakompaniýalaryň ilkinji onlugyna American Airlines, Play, Austrian Airlines, LOT Polish Airlines, Air Arabia, Widerøe we Air Serbia girdi.
Reýtingiň soňky ornunda 3,63 bal bilen Tunisiň Tunisair awiakompaniýasy ýerleşdi.
AirHelp-iň hasaby boýunça, dünýäniň iň gowy howa menzili adyna 8,52 bal alan Dohadaky (Katar) Hamad halkara howa menzili mynasyp boldy. Ikinji orny GAR-yň Keýptaun howa menzili (8,50) eýeledi, üçlügi Ýaponiýanyň Nagoýa şäherindäki Týubu howa menzili (8,49) jemledi.
Iň ýaramaz howa menzili 5,35 bal bilen 239-njy orny eýelän Tunis-Karfagen howa menzili boldy. Bu sanawda alty baldan az alan ýeke-täk howa menzilidir.
