Özbegistanyň Prezidentiniň ýanyndaky Howpsuzluk Geňeşiniň Sekretarynyň orunbasary, Özbegistanyň Prezidentiniň Daşary syýasy meseleler boýunça ýörite wekili Abdulaziz Kamilowa Türkmenistanyň «Hormatly il ýaşulusy» diýen at dakyldy. Degişli Permana Türkmenistanyň Prezidenti gol çekdi.
Sylaglamak dabarasy 11-nji dekabrda Türkmenistanyň DIM-nde geçirildi. Çärä Türkmenistanyň DIM-iň ýolbaşçy düzümi we işgärleri, ýurdumyzyň daşary ýurtlardaky diplomatik wekilhanalarynyň we konsullyk edaralarynyň ýolbaşçylary, Türkmenistanyň DIM-iň Halkara gatnaşyklary institutynyň professor-mugallymlary we talyplary, KHBS-iň wekilleri gatnaşdylar diýip, türkmen daşary syýasat edarasynyň saýtynda habar berilýär.
A.Kamilow şeýle hem Türkmenistanyň «Magtymguly Pyragynyň 300 ýyllygyna» atly ýubileý medaly bilen sylaglandy.
R.Meredow dabaraly ýagdaýda A.Kamilowa däbe öwrülen türkmen donuny we ak telpegi geýdirdi. Şeýle hem myhmana degişli şahadatnamalar we nyşanlar gowşuryldy.
A.Kamilow Türkmenistanyň Prezidenti Serdar Berdimuhamedowa we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa berlen bu ýokary sylaglar üçin tüýs ýürekden minnetdarlyk bildirdi.
Diplomat köpasyrlyk dostluga we hoşniýetli goňşuçylyga esaslanýan hyzmatdaşlygyň iki doganlyk halkyň bähbidine mundan beýläk-de üstünlikli ösdüriljekdigine we berkidiljekdigine pugta ynam bildirdi.
