10-njy dekabrda Prezident Serdar Berdimuhamedowyň tabşyrygy boýunça Mejlisiň Başlygy D.Gulmanowa Daniýa Patyşalygynyň Türkmenistanda täze bellenen Adatdan daşary we Doly ygtyýarly ilçisi Ýesper Wardan ynanç hatyny kabul etdi.
Duşuşygyň dowamynda ilçi Türkmenistanyň içeri we daşary syýasatynyň ileri tutulýan ugurlary bilen tanyşdyryldy. Diplomata okgunly durmuş-ykdysady ösüşi, halkymyzyň durmuş derejesini ýokarlandyrmagy maksat edinýän düýpli özgertmeleriň durmuşa geçirilmeginiň kanunçylyk binýadyny üpjün etmek babatda Mejlisiň alyp barýan işi barada gürrüň berildi.
Söhbetdeşligiň barşynda Daniýa Patyşalygynyň ilçisi ikitaraplaýyn we köptaraplaýyn görnüşde, şol sanda parlament derejesinde, iri halkara guramalaryň ugry boýunça, Türkmenistan bilen Ýewropa Bileleşiginiň ýurtlarynyň arasynda yzygiderli ösdürilýän dialogyň çäklerinde hyzmatdaşlygy ösdürmegiň geljegine ýokary baha berdi.
Şol gün ilçi Ýesper War şeýle hem Türkmenistanyň DIM-nde daşary işler ministriniň orunbasary Ahmet Gurbanow bilen duşuşyk geçirdi.
Daniýanyň ilçisi Türkmenistandaky diplomatik işini Moskwa şäherindäki rezidensiýasyndan alyp barar.
