10-njy dekabrda Prezident Serdar Berdimuhamedowyň tabşyrygy boýunça Mejlisiň Başlygy D.Gulmanowa Braziliýa Federatiw Respublikasynyň Türkmenistanda täze bellenen Adatdan daşary we Doly ygtyýarly ilçisi Marsel Fortuna Biatodan ynanç hatyny kabul etdi. Bu barada Türkmenistanyň Mejlisiniň saýtynda habar berilýär.
Duşuşygyň dowamynda dostlukly ýurduň doly ygtyýarly wekiline ýurdumyzda durmuşa geçirilýän giň gerimli özgertmeler we iri möçberli taslamalar barada giňişleýin gürrüň berildi. Şeýle-de ol milli parlamentiň alyp barýan işi bilen giňişleýin tanyşdyryldy.
Söhbetdeşler ikitaraplaýyn we köptaraplaýyn görnüşde, iri halkara guramalaryň, Türkmenistan bilen Latyn Amerikasy ýurtlarynyň arasyndaky dialogyň çäklerindäki gatnaşyklaryň geljegine ýokary baha berip, döwletara hyzmatdaşlygy işjeňleşdirmäge özara gyzyklanmalary beýan etdiler.
Ilçi Marsel Fortuna Biato türkmen-brazil gatnaşyklaryny pugtalandyrmak babatda ähli tagallalaryny gaýgyrmajakdygyna ynandyrdy.
Şol gün şeýle hem Türkmenistanyň DIM-nde daşary işler ministriniň orunbasary Ahmet Gurbanow bilen ilçi Marsel Fortuna Biatonyň arasynda duşuşyk geçirildi.
Ilçi Marsel Fortuna Biato geljek ýyl Braziliýada geçiriljek BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň 30-njy maslahatynyň (COP30) ähmiýetini aýratyn belledi we Türkmenistanyň wekiliýetini oňa gatnaşmaga çagyrdy.
Braziliýanyň ilçisi Türkmenistandaky diplomatik işini Astana şäherinde oturýan ýerinden alyp barar.
