Hytaýyň elektron ylymlary we tehnologiýa uniwersitetiniň (UESTC) alymlary daş-töwerekdäki reňke uýgunlaşyp bilýän innowasion materialy hödürlediler. Ol daşky iýmitlendiriş çeşmesi bolmazdan işleýär. Taslamanyň awtorlarynyň aýtmagyna görä, şeýle materialdan taýýarlanan geýim “adamy göze görünmeýän edip biler” diýip, TechSpot belleýär.
Täze oýlap tapyş barada Science Advances žurnalynda gürrüň berilýär.
Täze material molekulýar birleşmelere ýagtylygyň täsiri astynda gurluşyny üýtgetmäge mümkinçilik berýän “öz-özünden ýagdaýa sazlanýan fotohromizm” (SAP) tehnologiýasyna esaslanýar.
Tehnologiýanyň mümkinçiliklerini görkezmek üçin ylmy gözlegçiler dury konteýneri SAP ergini bilen dolduryp, ony dürli reňkli dury akril gutularyna ýerleşdirdiler. Netijede, ergin öz töweregindäki reňke uýgunlaşyp, reňkini üýtgetdi.
Şeýle-de, synaglaryň dowamynda material tebigy gurşawyň şertlerinde 30-80 sekuntda reňkini üýtgetmek ukybyny görkezdi. Ylmy gözlegçiler obýektleri görünmez ýaly etmek üçin pürkülýän örtükleri-de işläp taýýarladylar.
Döredilen material -20-den 70°C-a çenli temperatura çydamak bilen adatdan daşary şertlerde ulanmak üçin laýyk gelýär. Alymlar onuň modada, harby ugurda we gurluşykda peýdaly bolup biljekdigini belleýärler. Işläp taýýarlama çylşyrymly elektronikany ulanmazdan “gizleýji” tehnologiýalary döretmek üçin täze mümkinçilikleri açýar.
