Şweýsariýaly alymlar gipotalamusyň çuňňur gyjyndyrmasy esasynda ysmaz keselini bejermegiň usulyny oýlap tapdylar. Bu usul birnäçe ýyl ýöremedik hassalarda ýöremek ukybyny dikeltmäge mümkinçilik berdi.
Adatça, Parkinson keselini ýa-da sandyrama ýaly hereket bozulmalaryny bejermek üçin elektrik gyjyndyrmasy ulanylýar. Ýöne täze gözlegler oňurga ýiliginiň şikeslerinden gutulmagyň hasda netijeligini görkezdi.
Synag iki hassanyň gatnaşmagynda geçirildi. Şolardan biri 54 ýaşyndaky awstriýaly Wolfgang Ýagerdir. Ol 2006-njy ýyldan bäri maýyplar arabasyny ulanýar. Elektrodlar gurlansoň, ol ýöräp, gündelik işleri täzeden ýerine ýetirip bildi. Gözlegçiler onuň oturgyçdan turup, basgançaklardan özbaşdak ýöräp barşyny wideo aldylar.
"Elektrod oturdylyp, gyjyndyrma işjeňleşdirilen badyna ilkinji näsag derrew: "Men aýaklarymy duýýaryn" diýdi. Gyjyndyrmany artdyranymyzda, ol: "ýöremek isleýärin!" diýen sözleri dile getirdi. Bu adamlarda aýak gözegçiligi bilen baglanyşyklydyr öýdülmedik hem bolsa, dogry sebiti saýlandygymyzy görkezýär" diýip, alymlar aýtdylar.
Netijeler elektrik gyjyndyrma öçürilenden soňam täsiriň dowam edýändigini görkezdi. Alymlar oňurga implantalaryny goşmak bilen, bu usulyň beýleki tehnologiýalar bilen utgaşmasyny öwrenmegi meýilleşdirýärler.
Bu gözleg “Nature Medicine” žurnalynda çap edildi diýip, naked-science.ru ýazýar.
