Germaniýaly we müsürli arheologlar Lýuksordan uzak bolmadyk bir ýerde gaýany ýonup gurlan gadymy ybadathanany tapdylar. Bu toplum b.e. öňki II asyrda ýaşap geçen Ptolemeý VIII-iň döwrüne degişli diýip, Phys.org ýazýar.
Týubingen uniwersitetiniň arheologlary Müsüriň Syýahatçylyk we gadymyýet ministrligi bilen bilelikde Lýuksordan 200 km uzaklykda gadymy ybadathananyň girelgesini tapdylar. Bu ýerdäki gazuw-agtaryş işleri 2012-nji ýyldan bäri dowam edýär, ybadathanada işjeň barlaglar bolsa 2022-nji ýylda başlandy.
Mukaddes ýer faraonyň arslan kelleli Repit we onuň ogly Kolant üçin gurban berýän pursadynyň relýefi bilen bezelipdir. Ieroglifler ybadathananyň Ptolemeý VIII döwründe gurlandygyny anyklamaga mümkinçilik berdi.
Ybadathana toplumy bölekleýin weýran bolupdyr. Birwagtlar girelgäniň agzyndaky diňleriň boýy 18 metre ýetipdir. Toplumyň umumy ini bolsa 51 metre ýetýär. Minaralaryň birinde arheologlar uzynlygy 6 metr we ini 3 metr bolan otagy tapdylar. Onda ybadathananyň goşlary we amfora küýzeler saklanypdyr.
Şeýle hem barlagçylar ýokarky gata çykylýan basgançagy we ybadathananyň bir bölegini weýran eden hennek köwmek işleriniň geçirilen senesini anyklamaga mümkinçilik beren teňňäni tapdylar. Ol 752-nji ýylyň yzýanyndaky döwri görkezýär.
