Türkmenistanyň Halk Maslahatynyň Başlygy Gurbanguly Berdimuhamedow halkymyzyň milli gymmatlyklaryna, şan-şöhratly ýoluna, taryhda uly yz galdyran şahsyýetlerimize bagyşlap, «Hakyda göwheri» atly täze kitabyny ýazyp tamamlady we onuň ilkinji nusgasyny sowgat hökmünde Türkmenistanyň Prezidentine iberdi.
Resmi metbugatda çap edilen hatda bellenilişi ýaly, Gurbanguly Berdimuhamedow bu kitabyny "öz oý-pikirlerimi jemläp, ençeme maglumatlary seljerip, halkymyzyň bütin taryhyň dowamynda döreden hem-de häzirki nesillere miras galdyran milli gymmatlyklaryna, şan-şöhratly ýoluna, taryhda uly yz galdyran şahsyýetlerimize bagyşlap ýazypdyr".
«Watan diňe halky bilen Watandyr! Döwlet diňe halky bilen döwletdir!» diýip belleýşiňiz ýaly, halkymyz ýurdumyzyň at-abraýyny belende göterýär. Häzirki wagtda tutuş dünýäde türkmen halkynyň taryhyna uly gyzyklanma bildirilýär, ýurdumyzyň döwletli döwranyna, ösüşli gadamlaryna ýokary baha berilýär.
Biziň taryhy ýadygärliklerimiz, maddy we ruhy gymmatlyklarymyz umumadamzat medeni genji-hazynasyndan uly orun alýar, halkara ykrarnama eýe bolýar. Türki medeniýetiň halkara guramasy (TÜRKSOÝ) tarapyndan 2024-nji ýylyň «Türki dünýäsiniň beýik şahyry we akyldary Magtymguly Pyragy ýyly», şeýle hem bu ýylda Änew şäheriniň «Türki dünýäsiniň medeni paýtagty» diýlip yglan edilmegi hem her bir türkmenistanly üçin uly bagtdyr. Bu üstünliklerimizi beýan etmek bolsa meniň üçin uly mertebedir" diýip, türkmen halkynyň Milli Lideri nygtaýar.
