10-njy noýabrda Türkmenistanda Hasyl toýy mynasybetli dabaralar geçirildi. Esasy baýramçylyk çäreleri Garagum derýasynyň Aşgabat şäheriniň çäginden geçýän böleginiň kenarynda ýaýbaňlandy.
Hasyl toýunyň öňüsyrasynda S.A.Nyýazow adyndaky Türkmen oba hojalyk uniwersitetinde Türkmenistanyň Prezidentiniň tabşyrygy boýunça oba hojalyk pudagyny ösdürmekde we ekinleriň bol hasylyny ösdürip ýetişdirmekde ýokary netijeleri gazanan oba hojalyk işgärlerine döwlet sylaglaryny hem-de Türkmenistanyň Prezidentiniň adyndan gymmat bahaly sowgatlary gowşurmak dabarasy boldy.
Garagum derýasynyň kenarynda gurnalan ýörite meýdançada ýurdumyzyň medeniýet we sungat ussatlarynyň aýdym-sazly çykyşlary ýaýbaňlandyryldy. Açyk asmanyň astynda oba hojalygynda we gaýtadan işleýän senagatda gazanylan üstünlikler bilen tanyşdyrýan sergi guraldy. Onda ahalteke bedewlerini, türkmen alabaýlaryny, gözel tebigatymyzy wasp edýän amaly-haşam sungatynyň eserleri, milli şaý-sepler görkezildi.
Hasyl toýy mynasybetli, oba hojalyk toplumynyň işgärleriniň adyndan Türkmenistanyň Prezidentine 2021-nji ýylda doglan, Keremli atly mele reňkli ajaýyp ahalteke bedewini sowgat bermek dabarasy boldy.
Hasyl toýy mynasybetli dabaralar ýurdumyzyň ähli welaýatlarynda we Arkadag şäherinde hem giňden ýaýbaňlandyryldy.
