Jon Hopkins uniwersitetinden amerikaly alymlar ýürek infarktyny gan seljermesi boýunça birnäçe minutda anyklaýan elektron testi işläp taýýarladylar. Ylmy gözleg Advanced Science ylmy žurnalynda neşir edildi.
Infarktdyr diýlip güman edilýän adamlara, adatça, diagnozy tassyklamak üçin birnäçe test bellenilýär. Bu proses bäş minutyň içinde ýürek işjeňligini ölçemek üçin elektrokardiogrammadan başlaýar. Soňra infarktyň alamatlaryny ýüze çykarmak üçin gan seljermesi geçirilýär, bu barlaghana işi azyndan bir sagat wagt alýar we köplenç, ony gaýtalamaly bolýar.
Alymlaryň oýlap tapyşy nano-gurluşly üsti bolan mikroçibe esaslanýar, bu üste gan nusgasy çalynýar.
Bu “meta-üst” Raman spektroskopiýa seljermesi wagtynda elektrik we magnit signallaryny güýçlendirip, infarktyň biomarkerini birnäçe sekuntda görner ýaly edýär.
Ylmy gözlegçileriň bellemegine görä, döredilen usul bäş-ýedi minutda netije berip, bar bolan usullar bilen deňeşdirilende ýokary takyklygy üpjün edýär.
Hünärmenler testiň öýde we gyssagly gulluklaryň işgärleri tarapyndan ulanmak üçin amatlydygyny bellediler. Alymlaryň pikiriçe, döredilen usul rak we ýokanç kesellerini ýüze çykarmak üçin uýgunlaşdyrylyp bilner.
