15-nji oktýabrda Türkmenistanyň daşary işler ministri Raşid Meredow Yslamabatda Pakistanyň Premýer-ministri Şahbaz Şarifiň bilen duşuşyp, ikitaraplaýyn gatnaşyklaryň häzirki ýagdaýy we ösüşiniň geljegi barada pikir alyşdy. Bu barada Türkmenistanyň DIM-niň metbugat gullugy habar berdi.
Duşuşykda taraplar türkmen-pakistan hyzmatdaşlygynyň ileri tutulýan ugurlaryny kesgitlediler we syýasy-diplomatik, söwda-ykdysady, medeni-ynsanperwer we beýleki ugurlarda döwletara hyzmatdaşlygyny dowam etdirmäge taýýardyklaryny tassykladylar.
Hususan-da, Türkmenistan – Owganystan – Pakistan – Hindistan (TOPH) gaz geçirijisiniň we Türkmenistan – Owganystan – Pakistan (TOP) ugry boýunça ýokary woltly elektrik geçiriji liniýasynyň taslamalarynyň durmuşa geçirilmegi bilen baglanyşykly ikitaraplaýyn resminamalary taýýarlamak boýunça işi gutarmagyň ähmiýeti nygtaldy.
Ulag-logistika pudagynda bilelikdäki işleriň ähmiýeti hem bellenildi. Häzirki wagtda bu ugurda türkmen tarapy Pakistanyň iri kompaniýalary bilen hyzmatdaşlyk edýär, şolaryň arasynda National Logistics Corporation (NLC) aýratyn orny eýeleýär. NLC bilen hyzmatdaşlyk Hytaý – Pakistan – Owganystan – Türkmenistan ugry boýunça Merkezi Aziýa we Hazar sebitlerine çykalgasy bolan ýük gatnawlaryň mukdaryny ýokarlandyrmaga ýardam berer.
Şeýle hem taraplar hyzmatdaşlygyň özara gyzyklanma bildirilýän beýleki meselelerini ara alyp maslahatlaşdylar.
Türkmenistanyň wekiliýeti Şanhaý Hyzmatdaşlyk Guramasynyň Hökümet baştutanlarynyň geňeşiniň nobatdaky mejlisine hormatly myhman hökmünde gatnaşmak maksady bilen Pakistan Yslam Respublikasynda bolýar.
