10-njy oktýabrda Aşgabatda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň gatnaşmagynda «Kalbyň şypasy» atly binanyň hem-de durky täzelenen şaýoluň açylyş dabarasy boldy diýip, TDH habar berýär.
Dabaralara germaniýaly belli kardiohirurg, lukmançylyk ylymlarynyň doktory, professor Hans Maýsner hem gatnaşdy.
Türkmen halkynyň Milli Lideri professor Hans Maýsner bilen bilelikde atly paýtuna münüp, durky täzelenen şaýoluň aýlawly çatrygynda gurlan «Kalbyň şypasy» atly binanyň öňünde guralan aýdym-sazly çykyşlara syn etdi hem-de täze binanyň binagärlik-bezeg aýratynlyklary bilen tanyşdy.
Mermer we granit daşlaryndan gurlan sekizburçluk şekilindäki binanyň gurluşyk, bezeg işlerinde, şol sanda ýanaşyk ýerleri abadanlaşdyrylanda häzirki zamanyň ösen tejribesinden hem-de ylmyň gazananlaryndan işjeň peýdalanylypdyr. Bu özboluşly bina halkymyzyň saglygyny ileri tutulýan ugur edinýän ýurdumyzyň döwlet syýasatynyň nyşany hökmünde paýtagtymyzyň bu künjegine aýratyn bezeg berer.
