Ýakyn günlerde Arkadag şäherine ahalteke atçylyk sungatynyň we atlary bezemek däpleriniň ÝUNESKO-nyň Adamzadyň maddy däl medeni mirasynyň sanawyna goşulandygyny tassyklaýan güwänama gowşurylar. Bu barada Arkadag şäheriniň häkimi G.Mämmedowa Halk Maslahatynyň Başlygy Gurbanguly Berdimuhamedowa habar berdi.
Mälim bolşy ýaly, ahalteke atçylyk sungaty we atlary bezemek däpleri ÝUNESKO-nyň Adamzadyň maddy däl medeni mirasynyň sanawyna Türkmenistanyň hödürnamasy esasynda 2023-nji ýylyň dekabrynda goşuldy.
Munuň özi ahalteke bedewleriniň gadymy mekany bolan ýurdumyzda bedewleriň arassa ganlylygyny saklamak, olary milli seýisçilik däpleri esasynda idetmek we atlaryň baş sanyny artdyrmak, ahalteke bedewleriniň dünýädäki şöhratyny belende götermek babatda alnyp barylýan işleriň halkara derejede ykrar edilýändiginiň aýdyň beýanydyr.
Gurbanguly Berdimuhamedow ahalteke atçylyk sungatynyň we atlary bezemek däpleriniň ÝUNESKO-nyň abraýly sanawyna girizilendigini tassyklaýan güwänamany gowşurmak çäresine ýokary derejede taýýarlyk görülmelidigini aýtdy.
