«Türkmenistanyň 2026 – 2030-njy ýyllar üçin Milli tokaý maksatnamasy» hem-de «Türkmenistany temmäkiden azat ýurda öwürmek boýunça 2026 – 2030-njy ýyllar üçin Milli maksatnama», şeýle hem olary durmuşa geçirmek boýunça çäreleriň meýilnamalary tassyklandy. Degişli Kararlara Türkmenistanyň Prezidenti Serdar Berdimuhamedow gol çekdi diýip, TDH habar berýär.
Milli tokaý maksatnamasy daşky gurşawy goramak baradaky döwlet syýasatynyň hukuk esaslaryny pugtalandyrmak, klimatyň üýtgemeginiň täsirini azaltmak we ekoulgamlaryň hem-de tokaý hojalygynyň onuň netijelerine durnuklylygyny ýokarlandyrmak boýunça esasy hereket ugurlaryny kesgitlemek maksady bilen kabul edildi. Bu resminama şeýle hem Türkmenistanyň «Howanyň üýtgemegi baradaky Milli strategiýasyny» durmuşa geçirmäge gönükdirilendir.
Temmäkä garşy göreş baradaky maksatnama bolsa ilatyň ruhy we beden saglygyny üpjün etmäge, raýatlaryň saglyk ýagdaýyny gowulandyrmaga, ilatyň abadançylygyny hem-de ömür dowamlylygyny ýokarlandyrmaga esaslanýar.
Karara laýyklykda, ministrliklere, pudaklaýyn dolandyryş edaralaryna, şeýle hem welaýatlaryň, Aşgabat we Arkadag şäherleriniň häkimliklerine temmäkä garşy göreş maksatnamasynda göz öňünde tutulan çäreleriň durmuşa geçirilmegini üpjün etmek tabşyryldy.
