3–5-nji noýabrda Türkmenistanda Gurluşyk we senagat toplumynyň işgärleriniň gününe gabatlanylyp, Aşgabatda «Türkmenistanyň gurluşygy, senagaty we energetikasy» («CIET-2024») halkara maslahaty we sergisi geçiriler.
Türkmenistanyň Gurluşyk we binagärlik ministrligi, Energetika ministrligi, Senagat we gurluşyk önümçiligi ministrligi, «Türkmenhimiýa» döwlet konserni we beýleki pudaklaryň guramagynda geçiriljek foruma gatnaşyjylary hasaba almak işi dowam edýär.
Maslahatyň barşynda gurluşyk, energetika, jemagat hojalygy, senagat we himiýa senagaty ýaly möhüm pudaklarda wajyp meseleler we taslamalar ara alnyp maslahatlaşylar. Çäräniň dowamynda bu ugurlara täze maýa goýum taslamalaryna üns berler. Arkadag şäheriniň gurluşygynyň ikinji tapgyryna bagyşlanyp mejlis geçiriler, onda lukmançylyk we gaýtadan işleýän kalsterler ara alnyp maslahatlaşylar.
«CIET-2024» halkara maslahaty we sergisi erkin senagat zolaklaryny döretmek we türkmen döwlet guramalarynyň halkara maliýe guramalary hem-de kompaniýalary bilen özara gatnaşygy barada pikir alyşmak, gurluşyk we energetika pudaklarynda halkara hyzmatdaşlygyny işjeňleşdirmek üçin meýdança bolar. Maslahat şeýle hem senagatyň ösüşine ýardam etmäge we sebitiň ykdysadyýetine maýa goýumlaryny çekmäge niýetlenendir, bu bolsa ahyrky netijede Türkmenistanyň we goňşy ýurtlaryň halkara derejesinde ornuny berkitmäge ýardam edýär.
«CIET-2024» halkara maslahatyna we sergisine gatnaşmagy wekillere Türkmenistanyň ykdysadyýetiniň gurluşyk we düzümleri dolandyrmak ýaly esasy pudaklaryna maýa goýum mümkinçiliklerine has gowy düşünmäge, şeýle hem uzak möhletleýin hyzmatdaşlygyň geljegini ara alyp maslahatlaşmaga mümkinçilik berer. Çäre barada has giňişleýin maglumatlary resmi saýtyndan tapyp bolar.
