Abu-Dabiniň Halifa uniwersitetiniň arheologlary emeli aňyň kömegi bilen çölde arheologiki obýektleri gözlemegiň täze usulyny tapdylar. Bu usul hemra suratlaryny seljermek üçin sintetiki apertura radaryny (SAR) we maşyn biliminiň algoritmlerini birleşdirýär diýip, CNN habar berýär.
Adaty ýerüsti gözlegler we hemra suratlary, köplenç, çöl şertlerinde çäge tupanlary we alaňlar sebäpli kynçylyklara sezewar bolýar. Şonuň üçin alymlar gözlegiň täze usulyny oýlamaly boldular.
“Bize ýol görkezip, ylmy gözleglerimizi gönükdirjek bir zat gerekdi” – diýip, atmosfera boýunça hünärmen we taslamanyň esasy gözlegçileriniň biri Diana Frensis belleýär.
Şonuň üçin ylmy gözlegçiler algoritmi okatmak üçin gadymy Saruk Al-Hadid oturymly ýerinden alnan maglumatlary ulanmak kararyna geldiler. Maşyn bilimi tehnologiýasy gizlin obýektleriň üç ölçegli modelini 50 sm çenli takyklyk bilen döretmäge mümkinçilik berýär, bu hem arheologlara potensial gazuw-agtaryş ýerlerini has takyk kesgitlemäge kömek eder.
Bu şeýle tehnologiýalaryň arheologiýada ilkinji gezek ulanylmagydyr. Frensisiň aýtmagyna görä, algoritm möhüm arheologiki tapyndylary saklap biljek täze sebitleri eýýäm görkezdi.
