Ilon Maskyň esaslandyran Neuralink startapynyň beýni implantlary häzirki wagtda 12 näsaga ornaşdyryldy. Şolaryň sekizinjisi — Nik Reý skleroz keselinden ejir çekýän näsag bolup, pikir güýji arkaly hereket edýän robot goly dolandyrmagy öwrenip başlandygyny paýlaşdy. Oňa implant şu ýylyň iýul aýynda goýuldy.
Şu hepde Nik sosial ulgamlarda diňe implant bilen däl, eýsem ARA atly robot manipulýatory bilen hem üstünlikli aragatnaşyk saklamagy öwrenýändigini paýlaşdy. Bu enjam oňa gündelik durmuşyň käbir ýönekeý hereketlerini ýerine ýetirmäge kömek edýär.
Kesel sebäpli öň oňa fiziki taýdan sekiz sagatdan köp işlemek kyn düşýärdi, emma indi ol yzyny üzmän üç sagatlap robot goluny işjeň ulanandygyny beýan etdi. Nik robotyň kömegi bilen kepka geýip bildi, sowadyjy açdy, gapaklary çalyşdy, mikrotolkunly peçde nahar gyzdyrdy we stakandan turbajyk arkaly içgi içdi. Şeýle hem ol indi elektrik arabalary dolandyrmagy öwrenýär we otaglaryň içinde pes tizlikde ynamly hereket edip bilýär.
Nik şeýle-de hereket ukyby çäklendirilen adamlaryň ulanýan motorika türgenleşikleri bilen meşgullanýar. Ol stoluň üstünde silindrleri süýşürmek we çöpler görnüşindäki detallary öwürmek ýaly ýörite türgenleşikleri indi bary-ýogy bäş minutda ýerine ýetirip bilýär.
Onuň bu üstünlikleri, hereket ukybyny keselden ýa-da şikesden soň ýitiren beýleki näsaglara-da, gündelik işleri ýene-de dolandyrmak babatda umyt berýär.
