Innovega kompaniýasy agramy 70 grama-da ýetmeýän «Gen One» akylly äýnegini hödürledi. Enjam daş-töweregiň şekilini görüjiligi pes adamlaryň aýratynlyklaryna laýyklykda özgertmäge we sazlamaga niýetlenendir.
Äýnege gurnalan kamera töweregi surata düşürýär, programma üpjünçiligi bolsa şekiliň göwrümini, ýagtylygyny, kontrastyny we kesgitleýjiligini üýtgedip, ony «micro-OLED» mikrodispleýlerine çykarýar. Maglumatlary işläp düzmek üçin enjam adaty smartfona birikdirilýär.
Başlangyç döwründe bu startap DARPA we «Tencent-iň» maliýe goldawy bilen AR (artdyrylan hakykat) kontakt linzalaryny işläp düzýärdi. Ýöne tehnologiýa ägirtleriniň AR-äýnekler üçin köpçülikleýin bazarynyň ýoklugy sebäpli, kompaniýa esasy ünsüni görüjiligi pes adamlara kömek etmäge gönükdirdi. Kompaniýanyň çaklamalaryna görä, bu tehnologiýanyň agramly müşderileri bütin dünýä boýunça takmynan 300 million adamy düzýär. Olar görüş ukybynyň ep-esli bölegini ýitiren we tekst okamak ýa-da adamlary tanamak ýaly gündelik zeruryýetlerde kynçylyk çekýän adamlardyr.
Enjam 3 sagat işjeň işlemäge niýetlenendir.
Kompaniýanyň ýerine ýetiriji direktory Stiw Willi önümiň maksadynyň görmesi kyn adamlaryň özbaşdaklygyny ep-esli ýokarlandyrmakdan hem-de olara başgalaryň kömegine mätäç bolmazdan, esasy gündelik işlerini ýerine ýetirmäge mümkinçilik bermekden ybaratdygyny belleýär.
Kompaniýanyň önümçilik boýunça hyzmatdaşy Quanta Computer bolup, bahasy 2950 dollardan kesgitlenen 100 sany öňünden sargyt edilen enjamyň gowşurylyşy 2027-nji ýylyň başynda başlanar.
