Samsung kompaniýasy orta derejeli Galaxy A27 5G smartfonynyň resmi tanyşdyrylyşyny geçirdi. Täze model Snapdragon tarapyndan öndürilen täze prosessor, frontal paneliň täzelenen dizaýny we uzak möhletli täzelenme goldawy bilen üpjün edildi. Muňa garamazdan, enjam özüniň öňki modelinde bar bolan möhüm häsiýetnamalarynyň birini ýitirdi.
Görnüşi boýunça Galaxy A27 köp babatda özünden öňki Galaxy A26 modelini gaýtalaýar. Smartfon 6,7 dýuýmlyk Super AMOLED ekrany (Full HD+ durulygy, 120 Gs täzelenme ýygylygy) bilen enjamlaşdyryldy. Iň esasy estetik üýtgetme — könelişen damja görnüşli oýugyň aýrylmagydyr. Indi 12 MP frontal kamera displeýdäki tegelek deşijekde ykjam ýerleşdirilipdir. Mundan başga-da, öndürijiler ekranyň daşyndaky çarçuwany has inçeltdi.
- Prosessor we ýat: Enjamyň esasy enjamlaýyn binýadyny Snapdragon 6 Gen 3 çibi (4-nm tehproses) düzýär. Samsung-yň mälim etmegine görä, ol Galaxy A26 modelindäki Exynos 1380 çibinden öndürijilik taýdan 10–20% öňe geçýär. Saýlamak üçin 6 ýa-da 8 GB operatiw ýat we 128 ýa-da 256 GB içerki ýat wersiýalary hödürlenýär, şeýle-de ony microSD kartlary arkaly giňeltmek mümkinçiligi bar.
- Kameralar we awtonomlyk: Arka tarapdaky kameralar toplumy optiki durnuklaşdyrma bilen 50 MP esasy moduly, 5 MP ultra giňburçly obýektiwi we 2 MP makromoduly öz içine alýar. Batareýanyň göwrümi 5000 mA·sag bolup, 25 watt çalt zarýad beriş ulgamyny goldaýar.
- Operasion ulgam we emeli sň: Smartfon One UI 8.5 interfeýsli Android 16 ulgamynda işleýär. Enjama akylly funksiýalaryň toplumy girizildi: Circle to Search, Object Eraser, sözleýşi tanamak, şeýle hem Google Gemini, Perplexity AI we täzelenen Bixby kömekçisi bilen utgaşyklyk bar. Öndüriji rekord derejede 6 ýyllyk operasion ulgam we howpsuzlyk täzelenmelerini kepillendirýär.
Esasy kemçiligi
Täze önümiň iň uly kemçiligi — korpusynyň gorag derejesiniň peseldilmegidir. Galaxy A26 modelini suwa çümmekden goraýan doly derejeli IP67 standartynyň deregine, täze model diňe IP64 standartyny aldy. Bu görkeziji diňe tozandan we tötänleýin suw damjalaryndan goramagy kepillendirýär, ýöne telefony indi suwa salmak bolmaýar.
Galaxy A27 modeliniň satuwy 3-nji iýula bellenildi. Smartfonyň bahasy onuň wersiýasyna baglylykda 350 dollardan başlar.
