Demirgazyk Kaliforniýanyň Federal okrug kazyýeti milliarder Ilon Maskyň OpenAI kompaniýasynyň ýolbaşçylygyna, şol sanda baş direktor Sem Altmana we kompaniýanyň prezidenti Greg Brokmana garşy beren şikaýat arzasyny ret etdi.
«BBC News» gullugynyň habar bermegine görä, bu çözgüt oturdaşlar kazyýeti tarapyndan biragyzdan kabul edildi. Olar bu şikaýat arzasynyň şeýle işler üçin bellenilen möhlet geçenden soň tabşyrylandygy baradaky netijä geldi.
Kazyýet işi üç hepdeläp dowam etdi. Bu döwürde oturdaşlar kompaniýanyň içki hat-habarlaryny öwrendi we taraplaryň görkezmelerini diňledi. Karar iki sagatlap dowam eden maslahatlaşmadan soň yglan edildi.
Gutarnykly çözgüdi kazy Iwonn Gonsales Rojers kabul etmeli, ýöne ol eýýäm oturdaşlaryň netijeleri bilen ylalaşýandygyny mälim etdi.
«Meniň pikirimçe, oturdaşlar kazyýetiniň gelen netijesini tassyklaýan ýeterlik subutnamalar bar, şonuň üçin hem men bu işi gijikdirmän ýapmaga taýýar» – diýip, «CNN» kazynyň sözlerini getirýär.
Şikaýat arzasynda Mask OpenAI taslamasyna täjirçilik maksatly bolmadyk gözleg taslamasy hökmünde, takmynan, 38 million dollar maýa goýandygyny öne sürdi. Onuň pikiriçe, kompaniýanyň ýolbaşçylary emeli aňy jemgyýetiň bähbidine ösdürmegiň deregine täjirçilik işine üns berip, ilkinji ylalaşygy bozdy.
Mask Altmanyň we Brokmanyň OpenAI-yň dolandyryşyndan çetleşdirilmegini, kompaniýanyň täjirçilik bölüminiň işiniň bes edilmegini we özüne ýetirilen zyýanyň öwezini dolmagy talap etdi. Ol bu zyýanyň möçberini 150 milliard dollara çenli diýip bahalandyrdy.
