“Ussa Tirkeş” hususy kärhanasy Lebap welaýatynyň Çärjew etrabynyň Hojaili geňeşliginiň Bekaryk obasynda 400 orunlyk döwrebap umumybilim berýän mekdebi gurar. Munuň üçin ygtyýar berýän Karara Türkmenistanyň Prezidenti 22-nji sentýabrda gol çekdi. Karar resmi metbugatda çap edildi.
Resminama laýyklykda, Lebap welaýatynyň häkimligine bu mekdebiň taslamasyny düzmek hem-de ony ýanaşyk ýerlerini abadanlaşdyryp gurmak barada “Ussa Tirkeş” hususy kärhanasy bilen umumybilim berýän mekdep üçin aragatnaşyk, elektrik, gaz, suw üpjünçiliginiň we lagymyň meýdançadan daşarky eltiji inženerçilik ulgamlarynyň hem-de desgalarynyň taslamalaryny düzmek, olaryň durkuny täzelemek we täzelerini gurmak işlerini ýerine ýetirmek şertinde şertnamany baglaşmaga ygtyýar berildi.
Gurluşyk işlerine 2024-nji ýylyň oktýabr aýynda başlamak we umumybilim berýän mekdebi 2025-nji ýylyň sentýabr aýynda ulanmaga doly taýýar edip tabşyrmak bellenildi.
