22-nji sentýabrda Prezident Serdar Berdimuhamedow bilen Özbegistanyň Prezidenti Şawkat Mirziýoýewiň arasynda telefon arkaly söhbetdeşlik boldy.
Şawkat Mirziýoýew Serdar Berdimuhamedowy doglan güni bilen gutlap, berk jan saglyk, bagtyýarlyk, Türkmenistanyň abadançylygynyň, türkmen halkynyň rowaçlygynyň bähbidine alyp barýan köpugurly işinde uly üstünlikleri arzuw etdi diýip, TDH habar berdi.
Söhbetdeşler türkmen-özbek hyzmatdaşlygynyň ugurlaryň giň toplumyny, şol sanda oba hojalygy, elektroenergetika, nebitgaz, himiýa senagaty ýaly pudaklary we beýleki ugurlary öz içine alýandygyny bellediler.
Şunuň bilen birlikde, iki ýurduň sebitleriniň arasynda netijeli hyzmatdaşlyk ýola goýuldy, parlamentara gatnaşyklary yzygiderli ösdürilýär.
Serdar Berdimuhamedow ýurtlarymyzyň arasynda medeni-ynsanperwer ulgamda, hususan-da, bilim, ylym, saglygy goraýyş ulgamlarynda netijeli hyzmatdaşlygyň ösdürilýändigini nygtady.
Serdar Berdimuhamedow mümkinçilikden peýdalanyp, Türkmenistan bilen Özbegistan Respublikasynyň arasyndaky hoşniýetli goňşuçylyk gatnaşyklarynyň ösdürilmegine goşýan uly şahsy goşandy üçin özbek kärdeşine minnetdarlyk bildirdi.
