Lebap welaýatynyň çäginde ýerleşýän meýdançalaryň birinde geçirilen buraw işleriniň netijesinde senagat ähmiýetli gaz akymy alyndy. Bu barada wise-premýer B.Amanow anna güni geçirilen Hökümet mejlisiniň barşynda habar berdi diýip, “Watan” habarlar gepleşiginde aýdyldy.
Bellenilişi ýaly, “Türkmengaz” döwlet konserni we “Türkmengeologiýa” döwlet korporasiýasy tarapyndan çykarylýan uglewodorod serişdeleriniň möçberlerini artdyrmak ýurdumyzyň nebitgaz ýataklaryny gözlemek we özleşdirmek boýunça degişli çäreler görülýär.
Bu işleriň çäklerinde gaz känlerinde gözleg-barlag, baha beriş-ulanyş guýularyny burawlamak boýunça bilelikde işlenip düzülen degişli meýilnamanyň esasynda Ahal, Lebap we Mary welaýatlarynyň çäklerindäki meýdançalarda gözleg-barlag guýularyny burawlamak işleri meýilleşdirildi.
Lebap welaýatyndaky meýdançadan gaz akymynyň alynmagy çykarylýan “mawy ýangyjyň” möçberini artdyrmaga mümkinçilik berer.
Serdar Berdimuhamedow täze açylan gaz ýatagyny netijeli özleşdirmek üçin ähli zerur işleri geçirmegiň wajypdygyny nygtady we wise-premýere ýurdumyzyň çägindäki meýdançalarda gözleg-barlag guýularyny burawlamak işlerini yzygiderli dowam etmegi tabşyrdy.
