Türkmenistanyň Prezidenti Serdar Berdimuhamedowyň gol çeken Kararlaryna laýyklykda, ýurduň nebitgaz pudagyny döwrebaplaşdyrmak, tebigy gazyň çykarylýan möçberini artdyrmak, nebitgaz ýataklaryny özleşdirmek we olaryň gerimini giňeltmek maksady bilen, Hytaý Halk Respublikasynyň kompaniýalary bilen birnäçe şertnamalary baglaşmaga ygtyýar berildi. Bu barada TDH habar berýär.
Şeýlelikde, nebitgaz pudagynda öňde goýlan wezipeleri durmuşa geçirmek maksady bilen, «Türkmengaz» döwlet konsernine öz garamagyndaky edara-kärhanalar tarapyndan alnyp barylýan gurluşyk işleri üçin zerur bolan degişli möçberdäki polat turbalary satyn almak barada Hytaýyň «Julong Steel Pipe Co., Ltd.» kompaniýasy bilen şertnama baglaşmaga ygtyýar berildi.
Şonuň bilen birlikde, «Türkmennebit» döwlet konsernine ulanyş we gözleg-barlag guýularynda gazuw işlerini geçirmek üçin zerur bolan degişli möçberdäki oturtma we buraw turbalaryny satyn almak barada Hytaý Halk Respublikasynyň «Wuxi SP. Steel Tube Manufacturing Co., Ltd.» kompaniýasy bilen şertnama baglaşmaga ygtyýar berildi.
Resminamalara laýyklykda, şertnamalar degişli döwlet konsernleriniň öz serişdeleriniň hasabyna amala aşyrylar.
